Ang Damang sa Likod Kang Balay
Ang Damang sa Likod Balay
(Sulod si Biboy nga naga lungu-lungu.Ginalantaw kon may tawo sa palibot.Pagkamaan nga wara ti tawo, dayon na kuot kang anang bulsa.)
“Ako si Biboy, ang hari sa paupas damang!Kada sirum, rugya ako sa likod-balay para magpakaun kang akun sinakpan nga si marka Diablo.Ha! Ha! Ha!Wara pa ti may naka pierde kanakun! Kita nyo kon ano dya? Ka-ha!!Kaha kang posporo! Ha! Ha! Ha!Rugya naga hukmong ang alaga ko.Abi marka Diablo pagbugtaw! (dayon huyop-huyop kang posporo)Oras run para mag yapon!Sige!Lagsa si bulian! Ha! Ha! Ha! Dan, dan!Amo kara!Sige pa!Ha!Ha!Ha!Barambudi kang lawa mo!Sige pa!Putsa hasta indi kahulag!Tapos uyuti sa buli!Ha!Ha!Ha!Sige magpakabusog kaw hay sa rum-an ma derbi kita rugto sa likod kang eskwelahan.Kinahanglan perdihun mo gid ang damang ni Bentot!Ha!Ha!Ha!Sige pa!
“Tok!Araguy Nong!Este Nang gali!Ginapakdol mo ruman ako sa ulo?!”
“Huod! Wanhaw?Hoy Biboy!Kapira kaw bay hambalan nga indi mag agto sa likod balay kon sirum run hay duro lamok?Rugya kaw liwan?Ay abaw…kanami kanimo guripatun…!”
“Araguy! Araguy nang!Indi pag guripata talinga ko!Daw malabadyang run ria kalapad sa sagi mo kg guripat!”
“Buligi ko to kahimos ay.Damang tana imo…Kar-on damang ang ipayapon ko kanimo.”Si manong ria, ang gurang ko nga santunga.Santunga bahi, santunga man laki.
“ Sus! Si manang bala haw… Abi mo nang, ga dugang gali ang gwapa mo kon naga ugtas ikaw,hehe.”
“”Ay tuod kaw Boy? Ha-haay!Amo ra gusto ko kanimo hay ga sugid kaw ka tuod.” Amo ra kadasig magkambyu kang anang modo kon makabati kg dayaw.
“Tuodtana ra Nang!Bisan pamangkuton mo pa si Nanay.” (uruk-uk kadlaw)
“ Hala, dasiga!Basi maabutan kita dya ni Lolo.Kar-on baston gid ang maghusgar sa byuti ta nga darwa, ha-haayy!” (kiay-kiay)
Tok!Tok!
“Araguy! Biboy)
“Araguy!(Bibang/Bobong)
“Lolo!!”
“Hoy mga toto!Abi nyo maisahan ninyo ako?Bisan ga dukoy-dukoy lang dya si lolo nyo, masanag pa ang panurukan.Makatuhog pa gani ako kg dagum ni lola ninyo,hehehe.Kapira ta bay kamo hambalan nga indi gid kamo mag-agto sa likod balay kon sirum run hay tag ralagaw kg kama-kama?!Kag…Biboy?Bobong?Sa diin run kamo?Ginpalagyuhan nyo ruman ako?Paano to sanda nakalampuwas sa panurukan ko?”
“Amo dya pirmi ang eksena sa likod balay sa tagsa nga madakpan ako rugto nga nagapaupas ukon naga pangita kg damang.Magluwas sa magurang ko nga agi dyan pa si Lolo nga ulianun kag bungol nga nagapugong kanakun.Pero indi pwede nga mapunggan ako, sa rum-an run ang derbi kag kinahanglan mahanas kag mabaskog si marka Diablo.Kag…danay kaw, daw sa ginaramigan ako haw.Ano man, trangkasuhon ako?Daw wara man ako mataritihan kaina…”
“ Hoy, Biboy!Naano kaw?Ano sagi mo ka sikmuru dyan?”
“Ginaramigan ako nang kag nagakutoy busong ko.”
“Hala!Kag may lagnat kaw pa!Basi kinagat kaw kg damang kag na inpeksyon kaw?”
“Wara mong!Ako ang hari kang damang…”
“ Ano nga daman?” saligbat ni Lolo.“Nagadaman timo nga naga mukra man ang mata mo?”
“Maan kanimo Lolo, may lagnat si Biboy kag ga sakit busong na.”
“Ha?Basi gintuyawanikaw kg kama-kama? Kag lantawa bala dyang naga purula sa alipudwan mo?Sus, santisima!Ipatawag si Piryong!Ang pinakatanda nga manugbulong rugya sa atun baryo!”
Kag ginpatawag nanda si Piryong!
“Ha- haaaayyyyyy!!!( panguy-ab.Dayon kumod-kumod samtang ginahuyupan ang luy-a kag ipahid sa ulo ni Biboy)
“Ha-haaaayyyy!Ay abaw, ginsipalan si Biboy kang idalmunon sa inyo likod balay.”
“ Ti, kuon ko gid mong! Siguro gin hilabtan mo gid to ang bungyod sa likod balay.”
“Wara lo ah, para nagpungko man lang ako to samtang ga paupas damang..”
“Ayti, kon napungkuan mo bay bungot na!Hay wara kaw gid ga pamati kang hambal kanimo.Ti, ano mayad kadya?”
“Daw indi dya madara sa luy-a lang.Kinahanglan dya gid nga obrahan.Kinahanglan ang manok nga bukay nga itum ang kahig kag….”
“Mayad nga sirum kaninyo nga tanan!”
“Ay!Ano to ang naga-uwang?” pamangkot ni lolo.
“Ang radyo puwak rugya sa atun baryo, abi mamati kita.” Tapna ni manang kay lolo nga mahirit pa raad.
“Ginapanawagan sa tanan nga mag-andam gid sa sakit nga Dengue!”
“Ano kuno? Dangue?” pamangkot ni lolo.
“Dengue kuno lo!”
“Ano?Frangue?”
“Dengue! Lo! Dengue!” Ay, daw madura pagka agi ko kanimo.”
“Aw, dangue!Abi ko Dengue!”
“ Kon makagat kamo kg lamok nga may dara nga baktirya kang Dengue amo dya ang mga patimaan nga may Dengue ikaw.Una, nagasakit busong mo kag naga taas-naog ang lagnat.”
“Boy, indi bala sakit busong mo? Basi nakagat kaw kg lamok sa likod balay nga may Dengue!”
“Huud nang, kag naga saka-naog ang lagnat ko.”
“Hala! Basi may Dengue kaw?”
“Ano nga Dangue?Gintinuntuhan tana ra kg kama-kama.Uhud, may inagyan pa gani, ga purula!”
“Pangarwa, naga purula ang lawas ukon may “rashes” sa inglis.”
“Boy, may “rashes” kaw man.”
“Pangatlo, kon grabe run gid, nagadugo ang irong.”
“Maan, wara man tana nagadugo ang irong mo Biboy, indi bal—Biboy?!Naga dugo ang irong mo!.” Tyabaw ni lolo.
“Kon may amo ka dya nga sintoma, dar-a lagi sa pinaka marapit nga ospital.”
“Ayti, ano pa ang ginahulat ta? Hakwatun ta run si Biboy!” Ang mandar ni lolo dara ang kumpas kg alima.Kag ginburuligan nanda ako kg hakwat.
“Ay, dali lang! Daw mahulog ako! Aaahhhh!”
“Boy, Biboy!Bugtaw!Abu…ano run tana nga turog ria.Ga karahulog timo sa katre!”
“Ha? Damgo lang gali to? Abi ko kon tuod run ba. (kaptan ang irong kag gina usisa ang kalawasan).Diin si manang Nay? Ay, manong gali?”
“Rugto sa likod balay!”
“Ha?Ga iwan to?”
“Ga panglimpyo.Uso kuno kadya ang Dengue , amo nga ga panglimpyo to si manong mo.”
“Ang damang ko?”(kapkap sa bulsa)
“ Kag ginapanawagan nga indi sagi pamatay ang damang hay amo ra ang makabulig tapna kg lamok paagi sa anda lawa.Hala ibuy-i to ra ang damang mo kag buligan panglimpyo si manong mo.”
“Huud Nay.”
“Diin kaw liwat maagto Biboy?”
“Lolo?!”
****END****
sugidanun | Comment (0)Ang Abyan Ko Nga Si Sam - Katapusan
Anum run gid man ka bulan ang nagligad halin kg katapusan namun nga chat ni Sam. Tatlo ka adlaw pagkatapos nga nag-agto ang pastor sa balay nanday Sam sa pagpalayas kg malain nga ispirito. Nangin klaro ang tanan kay Joy kag kang gabii kg adlaw nga to, may nabaton ako nga offline msgs halin kana. Nangayo kg pasaylo sa anang ginpanghambal kanakun. Gin-ako na nga nagakaugot tana kanakun bangud sa sobra nga importansya nga ginapatamud ni Sam kanakun. Naintindihan ko si Joy kag nagdesisyon ako nga limitihan ko run gid ang pagchat. Amat-amatun ko nga magparayu kay Sam.
Talagsa run lang ako naga online.Kag kon online gid man ako, naga invisible mode ako para indi makita ni Sam. Kag sa tagsa pagbukas ko kang computer may offline msgs pirmi si Sam. Nalipay ako sa urihi nga mensahe ni Sam. Naaprobahan kg gobyerno ang application nanda para sa subsidy kg charity. Si Sam kag Joy naga obra man tulad sa sangka Ospital. Si Sam bilang doctor kag professor sa mga medical students. Rugto sanda mismo nagaistar sa compound kg Ospital. Si Kris, nagpakasal sa pastor nga gintugpo kato ni Sam kana. Gindilian run man kg pastor si Kris nga mag-obra.Nagapanamkun run si Kris. Kag bilang pasalamat kay Sam sa bag-ong kabuhi nga gintugro na, gin imbitar na sanday Sam kag Joy sa sangka sinalo-salo sa anda balay.
Si David.Nagakasubo gid si Sam sa paghambal nga nagdivorce sanda kg anang asawa. Pagkatapos kg pira ka bulan nga wara pagtandug ni David sa anang asawa, gin ako na nga may AIDS tana. Sa gilayon, gin asikaso na ang andang legal nga pagbulagay. Sa una nga pagbasa ko kg mensahe ni Sam parte kay David, nakalamhu ako bangud, nagmatuod gid ang hambal ko kay David.Kon nagpati lang raad tana kanakun nga mag untat sa anang pambabayi siguro, wara pa tana natapikan kg amo nga sakit.Pero sa pihak nga bahin, nagakasubo man ako sa anang dinangatan. Andut kinahanglan nga mangin urihi ang tanan antes mareyalisar kg sangka tawo ang ana pagsayup?
Ginbaslan ko ang mga mensahe ni Sam paagi sa offline msgs man. Kon kaisa nagabilin si Sam nga magchat kami sa amo kadya nga adlaw ukon oras pero pirmi ako may rason nga indi makaonline sa amo nga oras, gani daw naanad run man si Sam nga magbayluhanay run lang kami kg amun mensahe paagi sa offline msgs. Ang pinakaurihi nga mensahe ni Sam, may bag-o tana nga prohekto para sa mga kubos nga indi makasarang magpabulong ukon magpakonsulta. Sa tulad masaku si Sam sa pag kampanya kag fund raising para sa libre nga bulong kag konsultasyon kg mga pobre nga mga tawo sa anda lugar.Gusto ko magbulig pinansyal pero pobre ako. Gani ginaabay ko run lang sa akun pangamuyo ang kadarag-an kg tanan nga proyekto ni Sam. Siguro sa pira ka adlaw, kon palarun kag kon tugutan kg Diyos ang akun mga handum, isara sa akun mga handum amo ang makita si Sam sa personal. Gusto ko makita ang akun abyan nga sa sulod kg pira ka tuig nangin kabahin kg akun paminsarun kag baratyagun. Sangka abyan nga nangin kabahin… kang akun kabuhi.
***TAPOS***
sugidanun | Comments (4)Ang Abyan Ko Nga Si Sam 11
Sa sobra ko nga excited, naturugan ako ka hulat. Natupungawan run lang ako kg may nagtwag sa CP ko. Miskol ni Sam. Dali-dali ko nga ginbuksan ang kumpyuter. Online tana. Kag gin istorya na kanakun ang tanan.
Ginpatawag ni Sam ang mga gwardiya nga butangan kg kamera ang palibot kg balay, pero naghambal ang lider nga may mga kamera nga natanum sa sulod kag palibot kg balay. Ginpatanum kuno kg pinuno kg pulis nga nagistar kauna sa amo nga balay.
Ginlantaw ni Sam ang mga kamera. Nakita na ang kamera sa terasa. Sa kamera, makita ang bug-os nga kabilugan kg terasa. Katong gabii, nakita ni Sam si Kris nga naghulid kana. May foreplay nga natabo. Ang mga mata ni Kris nagasiga sa kadulum nga daw mata kg kuti. Pagkaburubhay nag-abot si Joy sa terasa, nagpalagyo si Kris. Si Sam, daw lipong nga nagakaturog kag hublas. Halus indi na mamokra ang ana mga mata. Naghulid si Joy. Gusto makipaglawas pero gintampa ni Sam dayun dalagan paagto sa sulod kg kwarto. Daw sa naudom si Sam kag ang urihi nga nagpabilin sa pinsar na amo ang hitsura ni Kris. Amo nga pagdumdum na, si Kris ang gintampa na pero sa camera makita nga si joy ang anang gintampa. Pero andut ginpanginwara ni Kris ang natabo?
Nag-agto si Sam sa Pychiatrist. Kag suno sa doctor, may sakit si Kris, Schizophrenia ukon split personality. Darwa ka personalidad ang ginadara ni Kris. Kag katong gabii, iba nga personalidad ang nagahari sa anang pagkatawo.
Kon split personality ang tawag kg siyensya, ginsudlan kg panulay ukon malain nga ispirito ang panawag kg simbahan. Kang tag-irigma kg amo man nga adlaw nagtawag kay Sam ang pastor nga migo ni tatay na, kag namangkot kon kamusta run tana. Nagsabat si Sam nga ok lang. Pero naangyus si Sam kang maghambal ang pastor nga, “Indi kaw ok. Indi manami ang kondisyon mo kag rugyan sa katalagman ang imo kabuhi.” Ang pastor may bugna kg kaaram kag makapakot kg mahimo matabo. Gin isplikar ni Sam ang tanan. Hambal kg pastor, biktima lamang si Kris. Gingamit lamang tana kg malain nga ispirito bangud rugyan tana sa madalum nga dipresyon kag kahuyang.
Namangkot man si Sam parte sa balay nga ginaulian nanda sa mga gwardya. Pito ka tuig ang nagligad, may naga uli nga mag-asawa sa balay nga ria. Ginpatay kg bana ang bataun nga asawa bangud kg dowry. Amo nga sa sulod kg 5 ka tuig wara ti nagaistar sa amo nga balay. Kang nagligad tuig lang, ang pinuno kg distreto kg pulis nag-uli man sa amo nga balay. Indi mapahamtang ang pulis gani nagpatakud kg camera sa palibot kag sulod kg balay. Ang anang asawa ginlugos kg gwardya pero ginlikum na dya bangud sa kahuy-anan. Tapos, sa kon ano nga baratyagun gintuyo na man nga luguson ang anang bata nga babayi.
Ang tanan natabo sa adlaw kg Biyernes. Ang bataun nga asawa ginpatay kg bana sa adlaw kg Biyernes ti kabii. Ang asawa kg Pulis gin lugos kag ginpatay sa adlaw man kg Biyernes ti kabii kag ginhana na man nga luguson ang bata na nga babayi, Biyernes man ti kabii. Si Kris, panilag ni Sam daw anga kon adlaw kang Biyernes. Wara nagapati sa ginahambal ni Sam kag daw nagakaugot kon makita na nga masadya ang mag-asawa. Mabuot si Kris pero kon mag-abot ang Biyernes, bug-os ang anang pagbaylo. Natabo ang paghulid ni Kris kay Sam kg Biyernes man ti gabii. Sara ang konklusyon, buta kg malain nga ispirito ang balay kag nagakatabo ang krimen sa adlaw kg Biyenes. Sa rum-an Biyernes maabot ang pastor sa pagpalayas kg mga malain nga ispirito kag sa pagpangamuyo para kay Kris. Kag sa rum-an man, mangin klaro ang tanan para kay Joy.
(sundan)
sugidanun | Comments (4)Ang Abyan Ko Nga Si Sam 10
Naduraan run gid ko kg paglaum. Daw mahibi ako, paano kon may matabo liwan sa gabii nga dya? Wara run ti Joy nga magpugong. Kabay pa mag online si Joy, kabay pa…
Daw ginpamatian kg Makaako ang akun pangamuyo, nag online si Joy.
Lee: Hi Joy!
Joy: Lee…
Lee: Diin kaw kadya?
Joy: Kanday Nanay. Sakit ulo na, amo nga rugya ako.
Lee: San-o kaw mauli?
Joy: Sa rum-an pa. Wanhaw?
Lee: Joy, palihog tawgi si Sam. Delikado tana tulad.
Joy: Ha? Paano nga delikado?
Lee: Basta Joy, tawgi lang. I check lang kon ok tana.
Joy: Ano ang ginapanghambal mo? Delikado sa ano si Sam? Rugto tana tulad sa balay sa amo dya nga oras.
Lee: Man-an ko kag rugto man si Kris. Indi man sa nagaduda ako, pero hindi kita kapakut kg mahimo matabo.
Joy: Tama run ra! Kon ano-ano ang ginapanghimo mo nga istorya. Warat basehan. May sarig ako kay Sam.
Lee: Kay Sam may sarig kita pero kay Kris?
Joy: Ano buot mo hambalun? Gina malisyahan mo si Kris?
Lee: Basta sunda lang ako palihog. Tawgi lang anay si Sam.
Joy: Ok. Pero hambalun ta kaw, wara ako ti oras sa mga istorya nga warat pulos.
Lee: Maintindihan mo gid ang tanan. Sa tulad indi ko pa mahambal kanimo ang tanan.
Buhay kag makita ko ang pag ulhot kg linyada.
Joy: Nakatawag ako run. Nagahana run magturog si Sam. Si kris nag-uli run pagkatapos nga ginhandaan kg panyapon si Sam.
Lee: Salamat. Ok lang kuno si Sam?
Joy: Kag ano sa pagdumdum mo ang sayud nga matabo kana?
Joy: Ginsarigan kaw namun. Ginkabig nga bukot iba. Pero ano ang ginhimo mo? Ga himo-himo kaw kg istorya nga bukot nami. Iba ang pagka kilala ko kanimo Lee. Kon ano man sa pinsar mo, indi ria mahimo ni Sam kanakun. May sarig ako kana. Kilala ko ang bana ko.
Lee: Joy, palihog indi paghangpa kg malain ang ginahimo ko. Gusto ko lang magbulig.
Joy: Magbulig? Ukon magtugro kg gamo sa amun pamilya? Tama run Lee, nadura gana ko kanimo. Bye!
Lee: Joy, ma man-an mo gid sa urihi ang tanan.
Nagturo ang luha ko sa kasubo. Nahiluan gid ang pinsar ni Joy. Natapos sa amo to ang tsat namun.
Patyun ko run daad ang computer kag mag online si Sam.
Lee: Hi Sam!
Sam: Hi Lee.
Lee: Musta kaw? Ano natabo? Ginatawgan ta kaw, indi man makontak ang CP mo.
Sam: Hungud ko nga ginpatay ang CP ko para wara ti sabad,hehe.
Lee: Ano natabo? Patyun mo gid ako sa kulba!
Sam: Kinulbaan kaw? Wara kaw ti sarig kanakun?
Lee: Wara sa dyan kara pero, paano kon matabo liwan ang natabo katong gabii nga nagakaturog ikaw?
Sam: Lee, may gin diskubre lang ako kadya nga gabii.
Lee: Naka chat ko si Joy. Nag-ugot kanakun hay gindudahan ko kuno ikaw ukon si kris.
Sam: Lee, bisan sin-o nga asawa amo man ra pinsarun da. Kapin pa bahul sarig ni Joy kanakun.
Lee: Gusto ko lang makabulig. Indi lang ako gusto matabo liwan ang natabo katong gabii.
Sam: Ok, naintindihan ko ikaw Lee. Pero inosenti si Kris.
Lee: Ha? Paano mo nahambal?
Sam: Gin testingan ko tana kaina. Gin korner ko sa kusina, pero nagluhod si Kris sa atubangan ko kag maghibi. Pangayuon ko lang kuno ang tanan nga serbisyo na, indi lang ang sangka bagay. Ginpamangkot ko tana kon handut naghulid kanakun sa terasa. Sabat na, wara kuno tana.
Lee: Sam…Indi ayhan ikaw ang nagsayup katong gabii? Indi ayhan wara ti Kris nga naghulid kanimo?
Sam: Lee, sigurado ako nga Kris to.
Lee: Pero paano mo pamatud-an? Ginapanginwara ni Kris ang natabo. Napamatud-an mo man nga inosenti tana indi bala? Kag kon nagdrama lang tana ukon nagbutig sa tubangan mo kaina, sa ano nga rason?
Sam: Ambay…indi ko masabat. Pero may kasolbaran gid ang tanan. Indi ako mag-untat hasta indi dya masolbar. Ginapangako ko.
Naturugan ako sa pagpaminsar kg mga anggulo. Ah…pabay-i nga si Sam ang magsolbar.
Pagkasunod nga adlaw, Huwebes. Alas kwatro sa hapon sa korea, nagtawag si Sam kanakun. Nasolbar na run kuno ang misteryo kag i istorya na kuno ang detalye kar-on sa gabii.
(sundan)
sugidanun | Comment (1)Ang Abyan Ko Nga Si Sam 9
Pagkalipas ang darwa ka oras. Online pa gid si Sam.
Lee: Hi Sam, ano natabo?
Sam: Lee, may indi ako maintindihan sa natabo. Nag-uli ako sa balay para hambalan ang mga gwardya nga butangan kg kamera ang palibot, pero naabutan ko si Joy nga nagapanghimos mapanaw kanday Nanay na hay maysakit si ugangan.
Lee: Tapos?
Sam: Tapos, gusto ko isugid kana ang natabo. Ugaring kang hana ko run ihambal, naghambal man si Joy nga naintindihan na kuno ang pagtampa ko kana.
Lee: Ha?! Paano natabo nga si Joy ang gintampa mo? Hambal mo si Kris ang gintampa mo.
Sam: Hambal ni Joy, nakita na kuno ako sa terasa nga nagakaturog kag hublas. Naghulid kuno tana kanakun, pero gintampa ko kuno.
Lee: Mayad bay wara natingala si Joy nga gintampa mo.
Sam: Naintindihan na kuno. Bag-o lang kami katapos away, siguro pinsar na nagaugot pa ako kag indi ko gusto nga hulidan. Pero nagalibug ang ulo ko. Sigurado ako nga si kris ang hulid ko bukot si Joy. Kag kon si Joy ang gintampa ko, andut pungyahon ni kris ang nagpula?
Lee: Makatiringala. Ano ang plano mo nga himuon?
Sam: Istoryahun ko ang pinuno kg mga gwardya nga takdan nanda kg kamera ang palibot kg balay. May gusto lang ako tukibun kar-on sa gabii. Timing, wara si Joy.
Lee: Ano plano mo Sam?
Sam: Tukibun ko ang tanan nga natabo, antes i istorya kay Joy. Basi indi ako makaonline ha? Gintugtan ko si Kris nga mag chat kanimo. Kon online tana, testingi nga i chat.
Lee: Sige. Pero para ano?
Sam: Basi bay may mabuol ikaw nga impormasyon.
Lee: Sige.
Sam: Bye anay.
Lee: Andam kaw pirmi. Bye.
Samtang nagahimos ako kg yapon, nagalibug man ang ulo ko. Ano gid bala ang natabo? Indi ayhan si Joy ang hulid ni Sam kag wara tana nakahulid si kris kana? Pero hambal ni Sam, sigurado tana nga si Kris ang hulid na. Ma man-an lamang ang tanan kon magsugid si kris kang matuod. Pero ano ang isugid ni kris kon inosenti tana? Kag ano ang plano ni sam kar-on sa gabii?
Mayad lang timprano pa nagturog ang mga bata. Naka online ako gilayon. Online si Sam.
Lee: Hi Sam.
Sam: Hello, Madam si Kris dya.
Lee: Oh Kris! Kamusta ka na?
Sam: Mayad man. Gintugtan ako ni Sir Sam nga magchat kanimo. Kon may bilin kaw kuno, hambalun mo lang kanakun.
Lee: Ah ok, salamat.
Sam: Kilala ikaw kg tanan nga staff rugya. Ginhambal ni Sir Sam kon sin-o man ang makasabat kg chat mo, tawgun tana. Pero may permiso ako nga maka chat kaw tulad.
Lee: Ginakalipay ko nga maka chat ko ikaw Kris. Gin istorya man ikaw ni Sam kanakun. Nami kaw kuno magkanta.
Sam: Tuod kaw? Indi man gid. Sa tuod lang, makaguwa lang ako kon dyan si Sir Sam. Ang tanan nga tawo gusto nanda ako nga sakitun pero dyan si Sir Sam nga naga apin kanakun. Sayud takun nga tawo Lee. Kag si Sir Sam lang paglaum ko nga magbag-o. Para kanakun , Diyos tana.
Lee: Ha?
Sam: Kon ang ibang tawo nagakabuhi para lamang sa andang kaugalingun, iba si Sir. Bilog na nga kabuhi ginabulig na sa mga kubos pareho ko.
Lee: Matuod ria.
Sam: Nabuhi ako liwat kg nag-abot si Sir. Amo nga para kanakun, Diyos tana. Gani himuon ko ang tanan nga makabalos kg utang ko nga kabaraslan kana.
Nagalibug ulo ko , paano ko umpisahan ang parte sa natabo sa balay nanday Sam. Kon may tsansa lang ako.
Lee: Bati ko rugto ikaw sa balay nanday Sam pira ron ka semana?
Sam: Huod. Nagmasakit si Maam Joy, ako nag-atipan kana kag nagbulig obra sa sulod kg balay.
Lee: Hasta kadya rugto kaw gyapon nagahingga?
Sam: Wara run. Pero maagto ako kar-on rugto para maghimos kg yapon ni Sir.
Kinulbaan ako. Indi ayhan, abay dya sa plano ni Sam?
Lee: Nakamaan si Joy? Nga maagto ikaw rugto sa balay nanda?
Sam: Siguro.
Lee: Indi ayhan, indi manami ria nga ideya nga maagto kaw rugto samtang wara si Joy?
Sam: Ginataw-an mo kg malisya ang pag-agto ko rugto? Himsan ko lang kg pagkaun si Sir tapos mauli man ako.
Lee: Ah ok.
Sam: Wara gid ako magpaabot nga hambalun mo ria. Gina respeto kaw ni Sir kag Mam Joy!
Lee: Sori. Ginahambal ko lang ang pwede mangin pinsarun kg mga tawo.
Sam: Wara ako ti sayud nga motibo. Gusto ko lang mag serbisyo kay Sir.
Lee: Ok. Naintindihan ko.
Sam: Indi ako makapabuhay. Naga sirum run. Maagto run ako kanda Sir para makahimos kg yapon.
Lee: Sige Kris. Salamat sa chat.
Sam: Salamat man.
Kinhanglan ma kontak ko si Sam. Indi pwede nga mag isarahanun tana imaw kay kris. Gindayal ko numero ni Sam. Cannot be reach. Si Joy, kinahanglan makauli si Joy sa balay nanda sa gilayon. Indi man makontak, Nagduyu ako kg makadali. Kon makontak gid man , ano ang hambalun ko? Paano ko hambalun kay Joy nga sa bingit kg pagtiraw si Sam sa kadya nga mga tinion?
(sundan)
sugidanun | Comment (1)
Ang Abyan Ko Nga Si Sam 8
“Hallo?”, limug ni Sam.
“Hello Sam? Ako dya! i miskol ta lang kaw raad—“
“Ok ,Lee. Mapanaw ako run. Nagyapon lang ko kag narigos. Sige hulata lang ko mga 5 mins.”
Amo lang to kag mag off ang cellphone na.
Singko minutos gid man ang hulat ko kag mag-abot si Sam. Naka prontong lang, sa sobra na nga dali nalipatan na nga isoksok ang pantalon na. Mayad lang hay dara na ang sarakyan, at least mga tawo lang sa opisina na ang ga lantaw kana. Natingala sanda.
Lee: Andut, nalipatan mo soksok pantalon mo? Haha!
Sam: Nagsala ko pagkasabat ko kg tawag mo. Sa tuod lang nalipat ako kon wara kaw nagtawag, wara ako kadumdum.
Lee: Nakamaan si Joy nga nag-agto kaw sa office mo?
Sam: Wara. Si Kris lang, kita na ko paguwa ko sa banyo kag pagsabat ko kg tawag mo.
Lee: Patay! Basi kon ano ruman ang ipanugid na kay Joy.
Sam: Pabay-i dyan.
Lee: Ti ano run to istorya mo?
Gin istorya ni Sam ang plano na.
Plano na nga ibaligya ang MT unit para ipatindug kg building kg tsarity hay nagarenta lamang sanda kg building. Isara ang tsarity sa mga aplikante para makabaton kg subsidy ukon suporta halin sa gobyerno kag ang sara kg mga requirements amo nga dapat may ana nga kaugalingun nga building.
Ginapamangkot ako ni Sam, kon mayad bala ang desisyon na nga pagbaligya kg MT unit? Indi na run kuno masarangan ang obra, kapin pa ginadilian tana kg dokor nga mag-obra 8 hours. Bawal kana ang stess. Ginapapahuway tana kg doktor. Gani si kris ang nagadumara kg MT tulad, maagto lamang si Sam sa hapon para magpirma kg mga pirirmahan ukon kon kinahanglan ang anang mga desisyon.
Nagpabor ako sa plano ni Sam. Duro pa nga prohekto ria basta buhi ka lang. Gindugang pa ni Sam, nga ginreto na kuno si Kris sa sangka pastor man. Pero ginbasted ni Kris sa kaugot, bangud tinawgan kg pastor si kris kg hinambalan nga nakita na kuno ang honeymoon video ni Kris. Nakalusot sa market ang nasambit nga video. Bisan si Sam nakakita kg amo nga video. Bangud kato, ginkondinar si kris kg mga tao nga magpakita sa simbahan. Amo man to ang rason kon andut, nagpabukot run lang si kris sa sulod kg kinse anyos sa andang balay.
Nalipay ako sa nangin desisyon ni Sam, nga pagbulig para maka umpisa liwan si kris sa anang kabuhi. Bisan pa ginapakalain na ako kay Joy. Naluoy ako kana. Daad makapamana liwan si kris kag daad sa mayad nga tawo.
Samtang naga chat kami ni Sam, nagtawag kana si Joy. Nangara bangud nagpanaw lang si Sam nga wara makainum kg anang bulong. Ginpahatud na karon ang bulong kay kris.
Naturugan ako nga may kabalaka, basi ang pagchat pa gid namun gabii ang halinan kg away kang mag-asawa.
Wara gid ako magsala. Pagkaaga, timprano pa nga online si Sam. Kag nanungid kg natabo kabii.
Lee: Hi Sam. Kamusta?
Sam: Lee! Nagbuang si Kris!
Lee: Ha? Paano nga nagbuang?
Sam: Wara sa anang kaugalingun. Kabii, nag-away kami Joy, bangud sa pagpanaw ko nga wara kasoksok kg pantalon kag wara ka inum kg bulong. Rugto ako nagturog sa terasa hay mainit. Kang nahamuk-an ako, naghulid kanakun si Kris.
Lee: Ha? Tapos ano ang natabo?
Sam: Abi ko si Joy. Nag romansahanay kami nga darwa. Sa urihi, nahimasmasan ako nga bukot si Joy ang hulid ko.
Lee: Paano mo naman-an nga si Kris ang hulid mo?
Sam: Kilala ko ang asawa ko Lee. Nakaagi run bata kg 2 ka bilog, iba ang lawas ni Kris. Slim kag wara ti buy-on. Madulom hay wara ti sulo pero man-an ko nga bukot si Joy to.
Lee: Ano ginhimo mo dayon?
Sam: Tinampa ko si Kris. Pero nagsiga ang mata na sa kaugot. Daw mata kg kuti. Sa sobra ko nga kahadluk, nagdalagan ako pasulod sa kwarto kag nanirado kg gawang.
Lee: Pagkaaga, wara mo ginpamangkot?
Sam: Pagkaaga, kang namahaw kami, pasimple lang si Kris. Daw wara lang ti may natabo kabii.
Sam: Ginpamangkot ko kon ano natabo sa bagiing na, andut nagpula. Sabat na kinagat kuno kg lamok.
Lee: Nakamaan bala si Joy kg natabo Sam?
Sam: Wara pa. Sugidan ko lang si Joy kon sigurado run gid ako kg natabo.
Lee: Ano ang plano mo? Basi bukot gid man to si Kris ang hulid mo? Basi murto? Hahaha!
Sam: Patakdan ko ria kg cam ang palibot kg balay, basi may nagtinunto kanakun. Aga pa ako nag-abot Lee, para i istora kanimo kag para aga pa ako makauli. May agtunan pa ako nga tawo. Kinahanglan matukiban ko kon ano gid ang matuod nga natabo.
Lee: Sige Sam. Halong kaw.
(sundan)
sugidanun | Comment (0)
Ang Abyan Ko Nga Si Sam 7
Nagsakit ang buot ko. Andut wara nanda ginsabat ang cellphone? Pagkabukas ko kg kompyuter, duro ang offline msgs halin kay Sam. Andut kuno wara ako naka online kg Biyernes ti gabii. Naghulat kuno tana. Andut kuno wara ako nagtawag.
Sin-o bala ang nagakapot kg cellphone na? Nagsampok ang kiray ko sa kainit.
Sabado ti gabii. Nakauli run kami sa balay. Ginbantayan ko si Sam nga makaonline. Mayad, pagka alas diyes ti gabii, nakaonline run si Sam.
Ginpamangkot ko tana parte sa phonecall ko. Wara kamaan si Sam, wara man nakamuno si Joy parte sa tawag ko. Wara man ti may nakita nga miscall si Sam… Paano bi nga may miscall hay may nagsabat gani.
Lee: Sam, lantawa bi sa “received call“ kang CP mo, sigurado ako nga rugto.
Sam: Ay,huud dali lang. Wara dya ngaran mo.
Ginmiscall ko si Sam liwat.
Lee: Amo ra ang number ko, lantawa bi liwat sa received call mo kon may pareho nga number.
Sam: Dali lang gid…
Sam: Rugya! Pati date. Nagtawag kaw kanakun ,Biyernes, alas onse sa aga.
Lee: Huud Sam, alas kwatro ti hapon rugya sa korea. Nakita mo? May nagsabat kg CP mo!
Sam: Dali lang bi… Panumdumon ko kon sa diin ako kahapon mga alas onse ti aga…
Sam: Aha! Nagpa CR gali ako, kag nabilin ang CP ko sa lamesa. Wara man ti iba nga tawo sa sulod kg office ko kundi si Kris.
Lee: Kon amo si Kris ang nakasabat kg CP mo. Andut wara naghambal?
Sam: Lee, pabay-i lang , pamangkuton ko tana sa Lunes. Andut wara gid tana nakamuno?
Lee: Nagtawag man ako kay Joy. Wara na man ginsabat.
Sam: Basi namayha si Joy, Lee. Man-an mo man limitado ang English ni Joy.
Lee: Bisan utod-utod tana ra nga English, maintindihan ko man.
Sam: Sakit gid buot mo?hehehe…smile run dyan.
Lee: Huud eh. Sin-o bala indi mag-ugot.
Sam: Pabay-i lang pamangkuton ko, sigurado ako nga may mga rason gid sanda.
Lee: Kon kaisa, nakita ko nga online ang sara mo nga account sa YM. Gina “hi” ta kaw , wara kaw man pagsabat.
Sam: Lee, account kg charity ria. Duro ang naga gamit. Kon online kaw, hambal ko indi gid nanda pagtandugon ang ang mga msgs halin kanimo. Hadluk sanda magtandug ukon magdistorbo kanakun kun naga chat ako kanimo.
Lee: Baw! VIP gali ako kanimo? Haha!
Sam: Huud eh! Ikaw kabay ang bestfriend ko. Haha! Hay..salamat nakakadlaw kaw run dyan.
Indi mabutigan kg webcam ang hitsura namun nga darwa.
Natapos ang chat namun nga mamag-an ang akun pamatyag. Amo gali ako kara ka importante para kay Sam. Tanan nga katapo kang charity kag MT Unit (natukod liwat ni Sam ang MT unit paagi sa bulig ni tatay na) kilala nanda ang ID ko. Kag warat bisan sin-o nga mangisog magdistorbo kay Sam kon nagachat kami nga darwa.
Pagkalunes it gabii, wara gid ako malipat nga mag online. Curious ako kg mga rason ni Joy kag Kris, andut wara nanda ginsabat ang tawag ko.
Hambal ni Sam, namayha si Joy magsabat hay indi ka diretso kg English na kag nanguyos nga nagtawag ako. Dugangan pa nga naghibi ang mga bata na. Naintindihan ko si Joy. Pero si Kris ginpanginwara na. Wara kuno tana nakabaton kg tawag ko. Sin-o gali to bay? Imposible nga wara may nagsabat. Indi mabutigan ang cellphone. Pagkasunod nga adlaw ginpasintud liwat ni Sam si Kris kag nag-ako ang babayi. Sa ano nga rason nga nagbutig? Indi kuno gusto ni kris nga magtawganay kami ni Sam sa CP. Naga chat man kuno kami, andut abi nga mag tawganay pa. Nagsanting ang akun talinga. Aram gid tana. Ginataw-an na kg malisya ang pagtawganay namun ni Sam?
Suno kay Sam, nagmigahay kuno si Joy kag Kris kag pirmi sanda naga istoryahanay kapin pa kg pagmasakit si Joy ,si Kris ang nagaatipan. Rugto si Kris nagaturog sa balay nanday Sam sa sulod run kg sangka semana. Malain ang panagupnup ko, indi ayhan ginapakalain ako ni Kris kay Joy?
Naghibi ako pagkachat namun ni Sam. Daw indi ako magpati, nga sa tanan nga bulig nga ginhimo ko, malisyahan pa nanda ang relasyon namun ni Sam. Dudahan pa nanda ang motibo ko sa pag chat. Ginpatay ko ang Cam kang paghibi ko, indi ako gusto nga makita ni Sam ang hitsura ko nga nagahibi. Daw indi man ako magpati nga si Joy, mapati kay Kris. Tingala ko man nga talagsa run lang naga chat si Joy kanakun. Kag kon mag istorya ako kana parte sa gina istorya ni Sam kanakun, mahambal nga andut una pa ako nakamaan kaysa kana. May punto man si Joy, pero ginpaathag ko kana, nga may mga bagay nga indi mo mahambal diretso sa imong mga mahal sa kabuhi pero mahambal mo sa imong bayan. Bangud sa rason nga indi ikaw gusto nga magkabalaka sanda kanimo. Abi ko naintindihan ria ni Joy, pero gintago na gali sa sulod kg ana tagipusuon. Nagahupot gali tana kg sakit kg buot kanakun. Tingala ko man kon kis-a nagapabati-bati pa si Joy nga, nagapapapel ako kay Sam kag ginaagaw ko ang role nya bilang asawa. Pero kon pamangkuton ko run gani kg diretso, masabat lang nga wara ah. Kadya ko run lang naintindihan ang tanan.
Naghambal si Sam nga limitahan namun ang pagchat kag kon pwede indi run anay kami magtawganay. Nagdugang pisngo ko.
Lee: Indi kaw magkabalaka, amo run dya katapusan natun nga pag chat.
Sam: Palihog, indi kaw maghambal kg amo kara. Ikaw ang bestfriend ko.
Lee: Sam, para wara ti gamo, indi run lang kita magchat. Tutal, nakaplastar kaw run man. Indi mo run ako kinahanglan.
Sam: Indi ria matuod. Palangga ko ikaw Lee, bilang abyan. Ang ginapangayo ko lang nga limitihan anay natun ang pag chat.
Lee: Ok…wara ti problema kanakun.
Sam: Mapati lang kon buksan mo cam mo kag makita ko nga naga yuhum kaw.
Lee: Indi kadya Sam. Palihog intindiha run lang ako.
Sam: Indi ako maghalin dya. Ma chat kita hasta mag-aga kon indi kaw magpakita. Bahala run….
Lee: Sunda run lang sanda. Ma out run ko.
Sam: Danay! Matawag ko kanimo.
Lee: Para ano pa?mmGinadilian kaw run gani.
Sam: Ti pakita anay, palihog. Indi ako kar-on mapahamtang kon indi ko makita nga ok ka lang.
Para matapos ang chat. Nagpakita ako sa cam. Pirit ko nga magyuhum, pero nagdugang pa gid gani yambi kg baba ko. Hindi ko mapunggan ang maghibi. Sakit gid buot ko.
Sam: Lee! Amo run lang kadya, I schedule ta ang chat. Ma send lang ko kanimo kg offline msgs kon san-o ako pwede. Please, tama run ra.
Nakita ko nga naghibi man si Sam.
Sam: Pasalamat kita Lee nga marayu kita sa sara kag sara. Bisan ano pa ka hambal nanda, marayu nga magmatuod ang ginapasibangud nanda kanatun.
Lee: Sige Sam. Mapahuway run ako.
(Daw mabuka ulo ko kag dughan.)
Sam: Yuhum anay ay. Kag indi sagi kuhit ang irong mo, haha!
Nakita ni Sam nga sigi kapot ko kg irong ko. Yamat nga irong, katol abi. Nakayuhum ako.
Sam: Amo tana ra, abyan ko. Sige makaturog run ako kadya kg mahamuok.
Lee: Sige…
Sam: Ma send lang ko offline msgs.
Lee: Ok.
Sa wara ginhungod, pareho kami nga online ni Sam kg Biyernes. Hapon sa korea kag aga sa India. Nagkontratahay kami nga magchat liwat sa gabii, alas onse sa korea kag alas sais sa India. May ipamangkot kuno tana kanakun. Gusto na lang kuno bul-on ang opinion ko. Lampas run alas onse, pero gyapon ka online si Sam. Naghulat ako kg mga 10 mins. Wara gyapon. 15 mins, 20, 30… Wara gyapon. Ginbuul ko cellphone ko, i miscall ko si sam, basi nalipat. Sangka ring pa lang, may nagsabat run, “Hallo?”
(sundan)
sugidanun | Comments (2)
Ang Abyan Ko Nga Si Sam 6
Pagsunod nga adlaw, may nabaton ako nga email halin kay David. Na stoke liwat kabii si Sam kag rugto tulad sa ICU!
Ginabasol ko ang kaugalingun ko sa natabo, hay kon naghipos lang ako kag nagpabaya wara raad natabo dya kay Sam. Nagligad ang sangka simana nga wara ako ti balita parti kay Sam. Mga kon ano-ano ang gasulod sa pinsar ko, tubtub sangka adlaw nakita ko nga online si Joy.
Lee: Hi Joy! Musta run?
Joy: Lee! Si Sam dya!
Lee: Omg! Ikaw ra Sam? Salamat hay naka online kaw! Sa diin kaw tulad?
Joy: Rugya sa balay ga pahuway-huway. Pasensya kaw lang nga wara run ako makaonline. Gin atake liwat ako katong gabii nga nagchat kita. Mayad lang dasig mag-abot ang ambulansya kag nahingagaw ako.
Lee: Sam, pasayluha ako. Kon bukot dahil kanakun, wara kaw gin atake. Ako pirmi ang rason kg pag atake mo.
Sam: Don’t be stupid Lee? Ako ang may sala kg tanan, bukot ikaw. Sarado katama ang pinsar ko, amo nga mabudlay kanakun magbaton kg mga suhestyon kg iba. Pero nasanagan run ako.
Lee: Sam…
Joy: Nag-agto si tatay sa ospital kag gin sermonan ako. Sin-o pa kuno bay ang manubli hay ako man lang isara nga bata na? May edad run tana kag gusto na run kuno magpahuway.
Lee: Husto si tatay mo Sam.
Joy: Na reyalisar ko nga ako lang batok sa tanan. Tanan kamo parareho ang opinion. Ano pa abi ang rason nga indi ko pagbatunon ang ginatanyag ni tatay?
Nalipay ako sa nabatian ko halin kay Sam.
Lee: Ginbaton mo run Sam?
Joy: Huud Lee kag salamat sa paathag. Anhun ko ang kadarag-an sa una ko nga misyon kon igakaantus man lang kg bilog ko nga pamilya.
Lee: Matuod ria Sam.
Joy: Sa rum-an run ako maumpisa obra bilang director kg charity. Kag ginbuul ko si Kristina bilang sekretarya.
Lee: Ha?! Ti, nakamaan si Joy?
Joy: Indi ko run kinahanglan ang opinion ni Joy. Hambalan ko lang tana sa sunod.
Lee: Pero Sam, indi bala dapat ginhambal mo anay kay Joy? Naga reklamo si Joy nga wara kaw run kuno oras kana kag sa mga bata, pirmi lang kuno kamo ga imaw ni Kris.
Joy: Lee, dapat mataw-an leksyon si Joy. Indi na maintindihan ang kawsa ko? Ako run lang bahala kana, indi kaw magkabalaka.
Lee: Sam, kon may misyon kaw sa ibang tawo, may responsiblidad kaw man sa pamilya mo.
Joy: Man-an ko Lee. Pero daad, imbis nga pamangkuton na ako kg oras ko kananda, daad ginabuligan na ako sa akun nga misyon. Dapat suportahan na ako. Antes kami kaslon Lee, ginpa sintud ko tana kon handa bala tana magpakasal sa misyon ko.
Lee: Ano ang buot mo hambalun Sam?
Joy: Simple lang. Kon ginabaton na ako bilang bana kag partner sa kabuhi, dapat batunon na man ang misyon ko bilang kabahin kg kabuhi namun. Wara gid tana ti rason nga magdili kanakun sa pagbulig kay Kris, bangud si Kris kabahin kg misyon ko.
Lee: Ok Sam. Kon amo ria ang desisyon mo, nagapati ako. Kabay lang gid nga magmigahay si Joy kag Kris, para wara kaw run ti problema pa.
Joy: Kabay pa lee. Btw, basi indi ako makaonline hay mangin masaku ako, pwede ka pangayo kg CP# mo? Tawgan ta ikaw kon san-o ako maka online.
Nagbayluhanay kami kg Cp# ni Sam. Kon indi tana makaonline sa regular nga oras kg pag chat namun, nagatawag tana kanakun. Sangka adlaw, ginhagad ako ni Kim nga rugto maturog sa andang balay hay pagkaaga sabado. Bieryenes pa lang ti hapon nadumduman ko run nga tawgan si Sam, nga indi ako makaonline. Darwa ka numero ang gintugro ni Sam, kay Joy kag ana numero. Gin dayal ko ang numero ni Sam, nag ring. Kabuhay, wara may nagasabat. Gindayal ko liwat, may nagsabat. Limug kg babayi, daw bukot man si Joy. Nabatian ko kauna ang limug ni Joy pag video chatting namun nga tatlo ni Sam.
“Hello? Si Sam dya?” ang pamangkot ko. Wara nagasabat, pero naman-an ko nga may nagsabat kg telepono. Pwede makahambal kay Sam? Si Lee dya, abyan na sa korea. Wara gyapon may nagasabat, pero mabatian ko ang ginhawa na sa telepono. Gin off ko ang CP. Gin dayal ko ang numero ni Joy, basi rugto si Sam sa balay nanda kag si Joy ang nagsabat pero namayha lang maghambal. Nag ring. Ginsabat “hallo.”, sabat sa pihak nga linya. “Hello Joy, Si Lee dya”. Wara run nagsabat. Nabatian ko ang syagit kg mga bata sa marayu. Si Joy siguro to, pat-ud ako, pero andut wara na ako ginsabat? Kag sin-o ang nagsabat sa cellphone ni Sam? Sakit buot ko.
(sundan)
sugidanun | Comment (0)
Ang Abyan Ko Nga Si Sam 5
Naka tsat ko si Sam kg adlaw ngato kag suno kana, tana lang ang nabilin nga pag-asa ni Kristina. Gusto na magtugro kg bag-ong kabuhi sa naurihi. Naobligar tana nga magbulig kay Kris. Bisan indi pa ako pabor sa iban nga paminsarun ni Sam, wara gid ako nagpakita kg disgusto, pareho kg pangako ko kay Joy. Nagsunod run lang ako sa ilig kg istorya ni Sam.
Nag-abot ang adlaw nga ginakahudlukan namun tanan. Nagahingapos run ang darwa ka bulan nga bakasyon ni Sam. Paano ruman tana makumbinsi nga magpabilin?
Suno kay Joy, gin tanyagan si Sam ni tatay na nga magpabilin kag magdumara kg tsarity. Nagapanag-iya si tatay na kg pira ka tsarity, simbahan kag eskwelahan. Kag gusto na nga si Sam ang manubli kag magdumara. Pero indi pagbatunon ni Sam, bangud gusto na magbalik sa syudad, para padayunon ang misyon nga ginbayaan. Gusto ko magbulig sa pagkumbinsi kay Sam, pero nangako ako kay Joy nga indi magtsat kg parte sa nagligad ukon makipagbais kay sam.
Pero nagapabilin sa akun paminsarun, nga pangako lamang ang tanan. Bangud sangka adlaw naka tsat ko liwat si Sam.
Sam: Lee, ano ang himuon ko? Gina kumbinsi ako ni tatay nga magpabilin kag batunon ang posisyon nga ginatanyag na.
Lee: Andut abi indi mo pagtaw-an kg kahigayunan si tatay mo?
Sam: Napaslawan ako Lee sa una ko nga misyon. Gusto nyo nga ako ang manubli kg ginpundar ni Tatay? Kag ano ang hambalun kg mga tawo? Nga wara ako kaubos kg sinamo ko? Tapos manubli ako kg kinabudlayan kg iba?
Lee: Sam, Indi iba nga tawo si tatay mo. Tatay mo tana, dapat lang nga ikaw ang manubli.
Sam: Kag ang mga tawo nga kaimaw na sa pagpabalhas para mapaugwad ang tsarity? Dumdum mo indi mamatok? Respetuhon ayhan nanda ako bilang bag-o nga direktor? Naman-an mo man nga indi likum kananda ang natabo kanakun sa misyon ko sa syudad.
Lee: Kon gina respeto nanda si tatay mo, respetuhon man nanda ang nangin desisyon na nga pagtugro kanimo kg posisyon.
Sam: Pero paano ang misyon ko rugto sa syudad?
Lee: Indi man gid kinahanglan nga magbalik kaw rugto para magpadayon kg misyon mo, di bala?
Kinakulbaan ako sa dalagan kg tsat namun ni Sam. Nangako ako kay Joy nga indi makipagbais kay Sam, pero paano tana makumbinsi kon indi ko kontrahun ang ana paminsarun?
Sam: Ano ang buot mo hambalun?
Lee: Sam, pwede mo man ipadayon ang misyon mo rugyan sa tsarity ni tatay mo. Bisan diin nga lugar kon ginatawag ikaw kg misyon, indi bala?
Wara ti sabat. Wara naga type si Sam.
Lee: Sam? Rugyan kaw pa?
Sam: Huud. Pasenya kaw lang ga paminsar ako.
Lee: Pinsarun mo lang Sam, nga ang tanan nga nagkaratabo may rason sa Ginoo.Indi ayhan amo dya ang kagustuhon Na? Nga rugyan ikaw magpadayon kg misyon mo, mismo sa inyo lugar?
Sam: Ambay lang. Ambay.
Sam: Ahh…ga sakit ang ulo ko. Dali lang gid…
Lee: Sam! Ok ka lang?
Sam: Ok lang ako.
Lee: Promise?
Sam: Promise. Out run ko Lee. Gusto ko magpahuway.
Lee: Sige Sam. Basta ok kaw lang ha?
Sam: Ok. Bye.
Lee: Bye.
Ginakulbaan ako sa nangin reaksyon ni Sam. May naga type, basi nagbalik si Sam?
Sam: Lee, si Joy dya.
Lee: Joy! Diin si Sam? Palihog sunda.
Sam: Ha? Wanhaw? Rugto tana sa banyo.
Lee: Palihog Joy, sunda to si Sam. Basi ano matabo kana!
Sam: Relax Lee, rugto tana sa banyo. Ano haw ang natabo?
Lee: I’m so sorry Joy, pero ginpaathag ko lang kana. Indi run dya maliwat! Sori gid!
Sam: Omg! Nangako kaw Lee! Nangako kaw kanakun nga likawan mo ang pagbais kay Sam! Andut wara kaw nagtuman sa atun hinambalan?
Lee: Sori gid wara ko ginhungod. Palihog agtuni anay si Sam!
Sam: Sige dyan kaw lang anay.
Naghibi ako sa kasubo kag kabalaka. Basi ano natabo kay Sam. Diyos ko! Kabay nga wara lang.
May naga type liwan.
Sam: Lee, ok lang si Sam. Rugto sa kwarto ga pahuway. Out ko anay lee.
Lee: Hay salamat! Sige Joy. Bye.
Sam: Bye.
Pagsunod nga adlaw, may nabaton ako nga email halin kay David. Na stoke liwat kabii si Sam kag rugto tulad sa ICU!
(sundan)
sugidanun | Comment (0)Ang Abyan Ko Nga Si Sam 4
Timprano pa ako naghimos kg yapon kg mga bata. Ginpayapunan ko sanda, ginparigusan kag ginpaturog. Excited run ako nga maka tsat liwat si Joy.
Pagbukas ko kg kompyuter, wara pa si Joy. Ginbistahan ko anay ang akun emails. Mga alas diyes gid man ti gabii sa Korea kg mag-abot si Joy.
Lee: Hi Joy! Kamusta run?
Joy: Lee! Salamat hay ginhulat mo ako. Kaina kaw pa?
Lee: Bag-o pa lang man. Kamusta? Kamusta si Sam?
Joy: Rugto sa simbahan, naga practice sanda ni Kristina kg kanta para sa service sa rum-an. Wara paghalin si Kris sa tupad ni Sam. Bisan rugya sa balay gusto na magsunod sa kwarto namun nga mag-asawa, pero gindilian ni Sam.
Lee: Sin-o gid si Kris sa kabuhi ni Sam, Joy? Daw indi run man siguro husto nga bisan sa kwarto nyo matabid pa tana kay Sam.
Kag gin istorya ni Joy kanakun si Kristina.
Si Kristina, klasmeyt ni Sam umpisa kg elementary hasta high school, suod nga abyan kag ilabi sa tanan ka duet ni Sam, sa kun diin man nga may kantahan ukon okasyon. Kang mag gradweyt sanda sa high school, nagsipak ang andang mga dalan. Si Sam, nagpadayun kg pagtuon na sa medisina sa syudad kag si Kristina ginpaban-an ni tatay na sa pagpati nga masigurado ang mangin buwasdamlag kg bata na.
Pero nagsala si Tiyoy Manuel, bangud ang pagpakasal ni Kristina kay Kumar nagdara kang pag-antus, kamatayun kag murder.
Sa una nga gabii kg honeymoon, wara ti hinalung-ung si Kris (Kristina) nga may natago nga kamera sa sulod kg kwarto. Ang tanan nga kahayupan nga ginhimo kg bana na kana, na record tanan sa kamera. Bluefilm producer gali si Kumar. Natukiban lamang dya ni Kris kg sangka adlaw, may mga babayi nga nagapakiglawas sa pira kg mga lalaki sa atubangan kg kamera, sa atubangan mismo ni Kris. Indi makapalag si Kris bangud, ginapahug tana nga kun magpamatok tana ukon magreport sa kapulisan, ipagawa kg bana na sa market ang video tape kang paghoneymoon nanda. Wara ti mahimo ang pobre nga Kris, kundi tunlun ang ano man nga pang-abuso nga ginahimo kg sapat sapatun na nga bana.
Tubtub sangka adlaw, indi run gid mabatas ni Kris ang nakita na. Mismo ang bana na ang naghimulos sa pobre nga teenager. Ginpainum nanda anay kg druga antes, ubahan kag himuslan sa atubangan kg camera. Nagdalagan palagyo si Kris nga nagahibi kag sa wara ginapaabot nga higayon nabungguan na si Tiyoy Manuel samtang nagadalagan pauli sa andang balay.
Rugto kag naman-an ni Tyoy Manuel, ang matuod-tuod nga sitwasyon ni Kris. Warat katupong nga kasubo, kasakit kag paghinulsol ang nabatyagan ni Tiyoy Manuel sa natabo sa anang bugtong nga bata. Abi na mangin malipayun si Kris sa luyo ni Kumar. Ginadayaw nga manggaranun si Kumar sa andang lugar. Ang pagdumdum ni Tiyoy Manuel sa pagpa 5-6 lamang naghalin ang manggad ni Kumar. Indi gali. Likum sa ana ihibalo, druga kag bluefilms gali ang raket ni Kumar. Daw indi mabaton baton ni Tiyoy Manuel ang natabo. Warat iba nga basulon sa nadangtan kg bata na kundi tana mismo. Dali dali nga nag-agto sa kusina si Tiyoy Manuel. Pagguwa na bitbit na run ang wara ti takub nga kutsilyo.
Naga hiribiun si Kris sa pagpugong kay tatay na. Amo man ang pag-abot ni Tiyay Francisca halin sa tindahan. Sa nakita na sa darwa na ka mata, may malain gid nga natabo. Ginbuligan na kg pugong si Kris. Napunggan nanda si Tiyoy Manuel kg oras nga to, pero kg masunod nga adlaw, nakita run lang ang bangkay ni Kumar sa sulod kg banyo nga buta kg saksak kang kutsilyo amo man ang lawas ni Tiyoy Manuel nga nabitay paagi sa hose kg shower. Murder kag suicide ang kaso.
Joy: Umpisa kato, wara run naguwa-guwa si Kris sa andang balay. Nagpabukot tana sa sulod kg kinse anyos hasta nga nag-abot si Sam.
Lee: Buot mo hambalun, kadya lang nakaguwa si Kris pag-abot ni Sam?
Joy: Amo ria ang istorya suno kay Sam.
Daw indi mapatihan ba. Naga parangligbos ang akun bolbol sa nga mga ginpanugid ni Joy.
Lee: Kaluluoy man gali si Kris. Si Sam run lang ang ginakaptan na nga paglaum.
Joy: Ambay lang gid Lee, pero mabug-at ang dugo ko kay Kristina nga ra. Kag si Sam, wara run ti oras sa pamilya na, puro lang misyon kag ibang tawo ang sulod kg pinsar na.
Pamatyagan ko, daw naga pangimon si Joy kay Kristina.
Joy: Lee, basi maka tsat kamo ni Sam, indi kaw gid mag mensyunar parte sa nagligad kag hindi mo man pagbaisun si Sam. Pasundan mo lang. Delikado ang sitwasyon ni Sam. Amo gani, nga bisan nagasunggod ako kana hay wara ga tinir sa balay, ginapasundan ko lang. Kabay pa nga nahangpan mo ako.
Lee: Naintiendihan ko ikaw Joy. Indi kaw magkabalaka. Indi run ako mag tsat kay Sam, para makalikaw.
Joy: Indi Lee! Sagapun kaw gyapon ni Sam, kag matingala andut wara kaw nag-online. Kilala ko si Sam. Palihog lang padayuna ang pag tsat kana, basta indi lang tana pagbaisa ukon indi lang pagmunuha ang parte sa pagbalik sa syudad.
Lee: Ok. Makalaum kaw.
Joy: Salamat Lee. Matuod kaw gid nga abyan.
Lee: Naintiendihan ko ang sitwasyon. Bisan ako, indi man maluyag nga may matabo nga malain kay Sam.
Joy: Hala Lee, nag-abot si Sam kag imaw na si Kris. Out ko anay.
Lee: Sige Joy.
Joy: Lee, ma tsat kuno si Sam kanimo.
Lee: Ha?!
(sundan)
sugidanun | Comments (4)